Geschäftsstelle

Mi Name isch Rosmarie Blaser, bi 47gi u wohne z Thun. I schaffe im Fahrdienscht für ä Schuelbusbetrieb Stäffisburg.

Mini Tätigkeit bim Tierschutz Region Thun umfasst ungefähr 40% vo mim Arbeitspänsum. Das isch o der Grund, warum uf der Gschäftsstell mängisch der Telefonbeantworter „redt“ u ig nid persönlech der Aruef entgäge nime.
We me mir aber ufe  Aruefbeantworter redt, lüten ig innert nützlecher Frist zrügg.

Am Vormittag ab de Nüne bis gäge Mittag u am Abe ab de Füfe bin i meischtens  erreichbar. O am Wuchenänd chame mi i dringende Notfäll kontaktiere.

I bi d Kontakstell für entloufeni, vermissti u gfundeni, bzw. zuegloffeni Tier i der Region. Derzue erledigen ig o d Poscht u d e-mails vom Tierschutz u bearbeite d Mitgliederdatei. Tierschutzberatig isch enorm umfangrych u geit vo Afrage über Schnäggeplaag im Garte bis zum Gstank wäge Nachbars Söi im Freiloufgheg…; die ganzi Pallette äbe.

Leider muess ig o immer wider mitübercho, wie sogenannti „Stägehuus- oder Wöschchuchizanggereie“ ufem Rügge vo schuld- u ahnigslose Tier ustreit wärde. Mängisch tueni tröschte, mängisch o chli zrächtwiise u mängisch loseni eifach zue we mis „Gägenüber“ e chli der Chropf mues lääre.

D Zämearbeit im Vorstand, mit üser Uffangstation im Heimbärg, de Tierärzt i der Region, wie o mit de Behörde u der Polizei louft meischtens erfolgrych ab. Mir schaffe dranne, dass d Verständigung mitenang u ungerenang immer besser wird.

Das isch e chline Yblick i mi normau Autag aus Leiterin vo der Gschäftsstell vom Tierschutz Region Thun. Uf e Kontakt mit Öich fröien i mi u bi bereit z häufe, wo s geit.